11/25/2007

بلياتشو


بلياتشو
لكن ..
بقلب جريح
ابان فرحان
وانا انسان
وف عز الدنيا
ابيع تفاريح
والناس بتضحك من غلبها
وعلى غلبى مش قادر اضحك
اكمنى صريح
. . .
بلياتشو

وبجرى وبتنطط
والعالم يجرى ويتنطط
يتلخبط
زى الالوان على وشى
باهته
لكن يبان متظبط
" وشى "
علشان يبقى
لعيونهم مريح
. . .
بلياتشو
وفنان ع المسرح
الناس تتفرج على فنى
مع انى
غاوى اتفرج ع الناس
فى وشوشهم انا دايما بسرح
ويتوه الفعل بينا
عليهم يبقى نسمة
وعليا يبقى ريح
. . .
بلياتشو
وبسترزق ..
م الهم والمه
وكل ما الهم يزيد
يزيد الضحك تمنه
مالك بيبان الضحك
لكن بيبان الفرح
خبت عنى المفاتيح
. . .
ابان طيب
وانا شرانى
مقتول
لكن جانى
بخلى الناس تضحك
تنسى
وان نسيت
افضل فاكر
وفى فكرى ابات انا وحدانى
آه يانى
ليه عقلى فصيح ؟!
. . .
بلياتشو
وع الحبل انا بامشى
لكن سكته ما بتخلصشى
ومليان مجاريح
. . .
بلياتشو
وبعشق بهلوانة
وهى فيا عشقانة
بالضحك بنينا بيتنا
ولما روحنا لفرحتنا
لاقيناها هربانة
ولاجل ما ترجع
لازم تاخد
من حزننا تصريح !

2 comments:

Yasmine Adel Fouad said...

جميلة اوى

من اجمل الحاجات اللى قارتهالك
فيها نضج و حرفية ووجع ابن ....


على فكرة كتابى هيبقى الصبح فى السوق ان شاء الله
مش جايالك تباركلى
جايالك اقولك حسك عينك ما تجيش حفلة التوقيع
اقسم بالله العظيم

علاقتنا هتنتهى

:)

^ H@fSS@^ said...

ممكن تاخدني بلياتشوهايه معاك؟؟
نضحك الناس عالمسرح
وبالليل نبات نبكي ما نفرح
بس نصحى تاني يوم نضحك و نسخسخ
تحياتي