12/27/2007

الحيطان

كل ماسأل الحيطان عن صورتي
ماتجوبش
ومرآيتى مكسورة
وكل يوم تتغير على وشي الخطوط والملامح
بتحلو ولا بتتكالح ؟
مش لاحق اتابع في مرآيات الناس
- من زمان ماشوفتنيش –
بس فاكر في مرة شفت قهوة في الكيت كات فيها كرسى على جنب لوحده ، قدامه شيشة وجنبيه طقطوقة عليها كوباية قهوة ، ساعتها قولت إن ده الكرسي بتاعى - أنا هنا - بس خفت لحسن تكون القهوة مظبوط ولا زيادة
فمشيت بسرعة
ودلوقتى بقول لو كنت بس دقتها

الجذمة ضاقت خنقت صوابعى
وصوابعى خنقت على خطويا

الكعب عالي
مش زي حالي
واللي جرالي
ماكنش بإديا

الجذمة ضاقت خنقت صوابعى
وصوابعى خنقت على خطويا

فرحى تجلي
مشتاق تملي
ولا حد قالي
إيه اللي بيا

الجذمة ضاقت خنقت صوابعى
وصوابعى خنقت على خطويا

في الحارة قهوة
وفى القهوة قهوة
رايحة في سهوة
وفى سهوة جاية

الجذمة ضاقت خنقت صوابعى
وصوابعى خنقت على خطويا

أحلامي هانت
لما بانت
ولا هي هانت
في يوم عليا

الجذمة ضاقت خنقت صوابعى
وصوابعى خنقت على خطويا

كان فيه آمان
يادى الزمان
أيام ماكان
طيفها حوليا

الجذمة ضاقت خنقت صوابعى
وصوابعى خنقت على خطويا

بياع غناوي
في الحب غاوي
فيها اداوي
وتجرحني هى

الجذمة ضاقت خنقت صوابعى
وصوابعى خنقت على خطويا

مش عارف ليه بتعاطف مع التنيين اللى بيحرس / بيحتجز الاميرة اكتر ما بتعاطف مع الفارس الشجاع اللى بيجيى بيسرقها / بيحررها

8 comments:

Hypatia said...

مصطفى

الخطوط والملامح يوم بتحلو
ويوم بتتكالح
بص فى المرايه لما تحس انك محلو
والخطاوى والغناوى والناس اللى بيجرحو وانت بتداوى

احساسك حلو وعالى

انا كمان باتعاطف مع التنين
يمكن عشان حاسه بوحدته

وياريت كنت دقت القهوه

sandrill said...

The best i have i have read for you

Keifak ?

Anonymous said...

مش عارف أقول لك إيه يا مصطفى بس بجد واحدة من أحلى 3 حاجات قريتهالك

مش عارف أرتبهم فمدي للتلاتة المركز الأول

سأعتزل مهنة إنسان
و دي
و بلياتشو

مصطفى اسماعيل said...

نسرين

شكرا على ذوقك

انا اليومين دول متفائل وهبص وهلاقى نفسى محلو كتير
:)

فعلن ده نفس شعورى تجاه التنين
بنصعب عليا

واستكمالا لحالة التفائل انا حاسس انى هلاقى مكانى وهقعد عليه واشرب القهوة بتاعتى

شكرا مرورك وتعليقك الجميل
:)

مصطفى اسماعيل said...

احمد

بجد سعيد بمرورك جداااا

وسيبك من اللى بكتبه
المهم نشوفك ولو عالمدونات

انا الحمدلله
كل سنة وانت طيب

مصطفى اسماعيل said...

يحيى

مش عارف ليه يا واد عايز امارس الشر معاك
وخصوصا وانت عمال تديهملى فى المندرة

بس هقولك ايه
بحبك

مش عارف ليه سأعتزل مهنة انسان مش عجبانى
حاسس انها عايزة تتظبط
عايز اعادة صياغة

الواحد كل ما بيعيش ثانية بيكون عايز يعدل الثانية اللى قبليها

وخايف / مش شايف الثانية اللى بعديها

ايه بقى
مش ناوى تورينا وشك ولا خلاص كملت
الستة وعشرين جنيه

واحشنى
:)

^ H@fSS@^ said...

كنت قلتل ي مرة قبل كده ان لو الواحد قال على الشعر دي حاجة حلوة يبقى ابخس من حقها
بس مش لاقفيه حاجة اقولها غير حلوة
دمعتني
ليه مش عارفة


لسه عندي امل انك تطبع كل ده و تنشره
مش عارفة انت مستني ايه

سلام

مصطفى اسماعيل said...

مش الشعر
الحاجة الحلوة
لأن اللى كاتبها لو مايعرفش انها لوة يبقى اهبل
ولو يعرف مش هيستنى اكيد منى كلمة حلوة


وطبعن كل ده مالوش علاقة باللى كاتبه



بس انا لسه بجرب
لسه ما بقاش عندى مشروع اقدمه

ادعيلى بس ربك يسهل